काठमाडौँ । नेकपा (माओवादी केन्द्र) ले उपसभामुख इन्दिरा रानालाई हटाउने सत्तापक्षको तयारीबारे गम्भीर चासो व्यक्त गरेको छ । केन्द्रीय कार्यालय पेरिसडाँडामा मंगलबार बसेको पदाधिकारी बैठकले उपसभामुख रानालाई हटाउन खोजेर सरकार अधिनायकवादी तथा निरङ्कुशतातर्फ अगाडि बढ्न खोजेको निष्कर्ष निकालेको हो । 

बैठकले प्रमुख प्रतिपक्ष दलको नेता भएको हिसाबले अध्यक्ष पुष्पकमल दाहाल प्रचण्डले नै पहलकदमीको जिम्मा दिएको सचिव गंगा श्रेष्ठले बताए । विकसित राजनीतिक घटनाका कारण बैठक भोलिसम्मका लागि स्थगित गरिएको उनले जानकारी दिए । 

‘सरकार अधिनायकवादी निरङ्कुश बाटोमा अगाडि बढेको बैठकले निष्कर्ष निकालेको छ । सत्ता गठबन्धनले उपसभामुखलाई हटाउने तयारी गरेकाले बैठक धेरै बेर बसेन । विपक्षी दलको नेताको हैसियतले अध्यक्षले नै पहलकदमी गर्ने जिम्मा दिइएको छ,’ उनले भने ।