दिएको छ कानुनी समानता
पानाहरू भरिएका छन् 
भेदभाव गर्नु हुँदैन 
गरे दण्ड मिल्छ
हटिसक्यो छुवाछुत 
सबैको पहुँचमा न्याय 
यस्तै पाठ पल्टाउन पाइन्छ दिनभर
तथापि 
दिलाउन सक्दैन न्याय 
गर्नै सक्दैन कार्वाही 
मैना ,निर्मला र पूजाहरूलाई 
पेसी सरिरहेछ धेरैचोटि
न्यायालयमा न्यायको पालो हराएको जस्तो।
राजनीतिको रागले थिचोमिचो भएर
प्रतिनिधित्व गुमाइरहेछ निम्नवर्ग
डलरबाहेक केही जान्दैनन् अधिकारवालाहरू
नाता थर अनि जातमा पनि त
हावी भैरहेको छ धन
चिच्याउनु परेको छ
न्यायको निम्ति 
जग भत्काउनु छ पुरानो 
समानता ल्याउन 
अझै नफाली नहुने कुरा त
उपभोक्तावादी सोच
तथापि 
आशा मरेको छैन 
सङ्घर्षको मैदानबाट 
निकाल्नु छ समवेत स्वर
दलन
उत्पीडन 
अन्त्य गर्न।
बदल्नु छ नीतिगत कमजोरी 
निर्णयमा ढिलाइ 
व्यबहारगत कमजोरी 
समतामूलक समाज निर्माण 
विभेदको अन्त्य सजिलो यात्रा कहाँ हो र१
बदल्न त बदलिनु पर्यो आफैं 
निरन्तर जगाउन पर्यो दमित आवाज
युवाहरूलाई भन्दैछ समयले
आशा मार्नु हुन्न 
पछि पर्न हुन्न।

तेजविलास 
इच्छाकामना- ३, चितवन ।